Kom ons praat weer Afrikaans!
Kom ons gee die tong van ons
'n kans
om weer te dans,
loshande te hang
oor die krans.
Kom ons laat die woorde klank,
woorde vir so lank
afgemaak as mank
Let tog wel
dat ek niemand wil vertel
van hoe die taal
'n genade dood moet sterf,
sal sterf
wil sterf.
Wragtig nee!
Daar was onreg in die naam van hierdie taal gepleeg
ons kan dit nie onder die mat inveeg
Ek staan op geen verhoog
om te betoog
dat ek met elke dialoog
net wil sien met 'n een-taal-oog!
Maar om hierdie taal te weeg
teenoor die onregte gepleeg
maak nie sin
want net sekeres het die taal gebruik
vir eie gewin.
Ander het die taal met moedersmelk ingekry,
het selfs hulle bevrydingstryd in hierdie taal gestry!
Ons kan dit nie vermy,
Afrikaans sal in ons gene bly!
Kom ons praat weer Afrikaans,
laat ons kinders dans,
loshande hang oor die krans
met onverbeterlike balans.
Kom ons vat die kans.
Kom ons praat weer Afrikaans!
Geen opmerkingen:
Een reactie posten